ជំពូកទី ៣ ស្ថាបត្យកម្ម និងប្លង់ (Project: Nita Apartment)

ជំពូកទី ៣

ស្ថាបត្យកម្ម និងប្លង់

បើយើងក្រលេកមើលទៅលើវិលស័យសំណង់ស្ថាបត្យកម្មក្នុងប្រទេសកម្ពុជានាពេលបច្ចប្បន្ននេះ យើងអាចកត់សំគាល់ឃើញថាប្រទេសកម្ពុជាមានសំណង់ស្ថាបត្យកម្មជាច្រើនកំពុងផុសឡើងពេញផ្ទៃប្រទេស​ ជាពិសេសគឺទីក្រុងភ្នំពេញ សំណង់ទាំងនោះ មានការរចនាម៉ូតផ្សេងៗជាច្រើនទៅតាមប្រភេទនៃការប្រើប្រាស់អគារតម្រូវការអតិថិជនទីតាំងសាងសងនិងគំនិតឆ្នៃប្រឌិតរបស់ស្ថាបត្យករក្នុងការរចនាអោយមានផាសុខភាពក្នុងការប្រើប្រាស់ទៅតាមតម្រូវការរបស់អ្នកប្រើប្រាស់។

៣.១ ប្លង់ទូទៅ និងទីតាំងសាងសង់

គំរោងសំណង់ដែលយើងបានលើកយកមកសិក្សារនេះមានលក្ខណៈជាស្ថាបត្យកម្មស្នាក់នៅបែបទំនើប ដែលកំពុងសាងសង់នៅលើទឹកដីរាជធានីភ្នំពេញ។      ដោយ​អគារ​ស្នាក់នៅប្រមូលផ្តុំនេះត្រូវបានសាងសង់នៅផ្លូវលេខ ៥៥៨ សង្កាត់ បឹងកក់១ ខណ្ឌ ទោលគៅក រាជធានីភ្នំពេញ។ អគារ​នេះមានបណ្តោយប្រវែង 16m​ និងទទឹងប្រវែង 10m ហើយមានកំពស់ 27.2m និងមានក្រលាផ្ទៃ 1440m² ។

៣.២ ទិដ្ឋភាពខាងក្រៅនៃអគារ

បើយើងក្រឡេកមើលទិដ្ឋភាពពីខាងក្រៅនៃអគារនេះ ជាអគារមួយប្រភេទដែលមានលក្ខណៈបែបខ្មែរសម័យទំ​នើប ហើយមានភាពរឹងមាំរំលេចទៅដោយពណ៌ស្រស់ស្អាតគួអោយចង់គយគន់ នៅចំពីមុខអគារមានច្រកចូលដែលមានដើម​ឈើនៅ​អម​សង​ខាងផ្លូវ និងមានកន្លែងសន្តិសុខយាមជាប់ច្រកចេញចូល។

៣.៣ ទិដ្ឋភាព និងរចនាសម្ព័ន្ធខាងក្នុងអគារ

ចំពោះផ្នែកខាងក្នុងនៃអគារត្រូវបានរចនាឡើងតាមបទដ្ឋានអន្តរជាតិ និងបានបំពាក់ទៅដោយឧបករណ៍អេឡិច ត្រូនិចទំនើបៗជាពិសេសនៅតាមបន្ទប់ស្នាក់នៅនីមួយៗត្រូវបានបំពាក់ដោយឧបករណ៍ និងសំភារៈទំនើបទាន់សម័យ និង​មាន​ក្បូរ​​​ក្បាច់​រចនានៅតាមពិដាន ដែលធ្វើអោយបន្ទប់កាន់តែមានបរិយាកាសស្រស់ស្រាយប្រកបទៅដោយ​ផាសុខ​ភាព​គួរ​អោយ​​ចង់​រស់នៅថែមទៀត  ជាងនេះទៅទៀតគឺមានបំពាក់ប្រព័ន្ធការពារសន្តិសុខសុវត្ថិភាពគ្រប់ទី​កន្លែង​​ទាំង​ក្នុង និង ក្រៅអគារ។

៣.៤ បន្ទប់តាមជាន់នីមួយៗ

តាមជាន់នីមួយៗមានលក្ខណៈធំទូលំទូលាយដែលបានបង្កភាពងាយស្រួលចំពោះការបែងចែកបន្ទប់។ នៅតាម​បន្ទប់ នីមួយៗមានទំហំខុសៗគ្នា និងមានលក្ខណៈទូលំទូលាយប្រកបដោយផាសុខភាព។​​ ចំពោះការរចនាសម្ព័ននៅក្នុងអគារ មានការរៀបចំដោយបំពាក់គ្រឿងទំនើបៗ ដូចជាៈ ការ៉ូសេរ៉ាមិច តុ កៅអីឈើល្អប្រណិត ទ្វារប្រកបដោយការរចនាម៉ូដល្អ មានបំពាក់ដោយអំពូលភ្លើងទំនើប មានជណ្តើរបេតុងអាមេ ...។ល។

៣.៤.១ ជាន់ផ្ទាល់ដី         

-​  សំរាប់ជាន់ផ្ទាល់ដី គឺជាចំណតរបស់រថយន្តផ្សេងៗ។

៣.៤.២ ជាន់ទី១

មានរចនាសម្ព័ន្ធដូចខាងក្រោម

​-  កន្លែងផ្តល់ពត៏មាន

-  ​បន្ទុបទទួលភ្ញៀវ 20.4m²    

-  បន្ទុបការរិយាល័យ 25.5m²  

-  បន្ទុកទឺក

៣.៤.៣ ជាន់ឡៅតឿ

-  បន្ទុបការរិយាល័យតូចៗ ៣ បន្ទុប

៣.៤.៤ ប្លង់ជាន់ទី២ ដល់ ជាន់ទី ៥

សំរាប់ជាន់ទី២ ដល់ជានទី៦ មានបន្ទប់ជាលក្ខណៈក្រុមគ្រួសារ ចំនួន២ ល្វែង។ ដែលក្នុង១ល្នែងៗមាន :

-  បន្ទុបគេង២

-  បន្ទុបទឹក២

-  បន្ទុបទទូលភ្ញៀវ ផ្ទះបាយ កន្លែងទទួលទានអាហារ

-  រានហាល

៣.៤.៥ ប្លង់ជាន់ដំបូល

សំរាប់ជាន់ដំបូល គឺជាកន្លែងអង្គុយមើលថ្ងៃរះ និងថ្ងៃលិច រួមទាំងជាកន្លែងអង្គុយផឹកកាហ្វេរ ឬស្រាបៀលក្ខណៈ   ធន់មធ្យម។

៣.៥ ប្លង់បន្ទប់ទឹក

បន្ទប់ទឹកទាំងអស់សុទ្ធតែត្រូវបានបំពាក់ដោយឧបករណ៍ទំនើបទាន់សម័យ​តំរូវតាមបទដ្ឋានអន្តរជាតិ    នៅក្នុង​បន្ទប់​ទឹក​នីមួយៗមានបិទដោយការ៉ូសេរ៉ាមិចនូវកំពស់ 2m ដែលមានទំហំ 200mm x 300mm នៅលើជញ្ជាំង។​ ​ហើយ​នៅ​​ផ្នែក​ផ្ទៃ​បាតបន្ទប់ទឹកក្រាលដោយការ៉ូសេរ៉ាមិចផ្ទៃគ្រើមទំហំ 300mm x 300mm ដើម្បីកុំអោយមាន​ការរអិល​ដួល​​​។

៣.៦ ប្លង់ជណ្តើរ និងបង្កាន់ដៃ

ជណ្តើរនៅក្នុងអគាររបស់យើងមានពីរប្រភេទ :

-​  ជណ្តើរឡើងតាមជាន់នីមួយៗ   ជាប្រភេទជណ្តើរដែលមានរាងអក្សរ U ធ្វើអំពីបេតុង​និងមានបង្កាន់ដៃ​ឈើ​ដែល​​​​ជា​ប្រ​ភេទឈើប្រណិតប្រកបទៅដោយក្បូរក្បាច់រចនាឆ្លាក់តាមបង្កាន់ដៃ។

-  ជណ្តើរយោង គឺប្រភេទជណ្តើរដែលដើរដោយថាមពលអគ្គិសនីដែលបានបង្កលក្ខណៈងាយស្រួលដល់ភ្ញៀវ​ដែល​​ស្នាក់​​នៅជាន់ខាងលើដែលប្រកបទៅដោយផាសុខភាព និងសុវត្ថិភាពផងដែរ។

៣.៧ ប្លង់ជញ្ជាំងខាងក្នុង និងខាងក្រៅ

ជញ្ជាំងអគារនេះចែកចេញជាបីប្រភេទសំខាន់ៗ

-​  ជញ្ជាំងឥដ្ឋបូកបាយអរធម្មតាដែលមានកំរាស់ 200mm មានតួនាទីសំខាន់ក្នុងការកាពារកំដៅ សំណើម និងសំ​លេង​​​​ពី​ខាង​​ក្រៅ និងការពារសន្តិសុខ។

-​  ជញ្ជាំងកញ្ចក់ដែលមានកំរាស់ 8mm បំពាក់នៅចំនុចខ្លះនៃតួអគារ    ដែលមានតួនាទីការពារដល់ផ្នែក​ខាង​ក្នុង​នៃ​ផ្ទៃ​​អគារ និងបន្ថែមសោភ័ណភាពដល់អគារអោយកាន់តែមានភាពស្រស់បំព្រង។

-​  ជញ្ជាំងផ្នែកខាងក្នុងជាជញ្ជាំងឥដ្ឋដែលមានកំរាស់ 100mm សំរាប់ខណ្ឌបន្ទប់ស្នាក់នៅនីមួយៗ និងបន្ទប់ទឹក។

៣.៨ ប្លង់សសរ

-  សសរនៃអគាររបស់យើងដែលបានសិក្សានេះធ្វើអំពីបេតុងអាម៉េដែលភ្ជាប់ជាមួយគ្រឹះនៅផ្នែកខាងក្រោម   ដែល​ធ្វើ​ការគាណនាតាមបច្ចេកទេសត្រឹមត្រូវ។ គ្រប់សសរទាំងអស់នៅក្នុងអគារនេះសុទ្ធតែជាសសរ​ជ្រុងដែលមានរាងជា​ចតុកោណកែង និង​​​​មានទំហំខុសៗគ្នាទៅតាមទីកន្លែងដែលវារងនូវបន្ទុក។

-​  សសរមានតួនាទីសំខាន់ក្នុងការទទួលបន្ទុកពីគ្រប់ទីកន្លែង ហើយបញ្ជូនទៅក្រោមរហូតដល់គ្រឹះ ហើយទប់និង កំលាំង​​កាច់បង្កោង កំលាំងខ្យល់ដែលអាចធ្វើអោយតួអគារទ្រេត នឹងដួលរំលំបាន។

-​  សសរក៏មានតួនាទីសំខាន់សំរាប់បង្កើនសោភ័ណភាពអគារអោយកាន់តែមានភាពស្រស់ស្អាតថែមទៀត។

៣.៩ ប្លង់ធ្នឹម

ធ្នឹមទាំងអស់នៅក្នុងអគារដែលយើងសិក្សាជាប្រភេទធ្នឹម  ដែលធ្វីអំពីបេតុងអាម៉េមានរាងជាចតុកោណកែង និង​មាន​​តួនាទីសំខាន់សំរាប់ទ្រហើយបញ្ជូនបន្ទុកពីកម្រាលខណ្ឌទៅអោយសសរ និងជួយទប់រំយោលនៃអគារ។ ធ្នឹមនីមួយៗមានទំហំខុសៗគ្នា​ទៅតាម​គំលាត​របស់​កម្រាលខណ្ឌនីមួយៗ។ ការកំណត់មុខកាត់ធ្នឹមធ្វើឡើងទៅតាមការគណនាដែលមានលក្ខណៈបច្ចេកទេស​ត្រឹមត្រូវ ទៅតាមបទដ្ឋាន។​

៣.១០ ប្លង់ពិដាន

ពិដាននៅក្នុងអគារត្រូវបានចែកចេញជាពីរ :

-  ពិដានដែលនៅខាងក្រៅបន្ទប់គឺយើងគ្រាន់តែធ្វើការបូក នឹងបិទម្នាងសិលាតាមជ្រុងធ្នឹមកម្រាល

-​  ​​​ចំណែកឯពិដាននៅក្នុងបន្ទប់ និងកន្លែងសំខាន់ៗមួយចំនួនទៀត គឺយើងធ្វើពីគ្រោងឆ្អឹងអាលុយមីញ៉ូមដែល​បំពាក់​​ទៅ​​ដោយម្នាងសិលាដែលមានក្បូរក្បាច់រចនា។

៣.១១ ការ៉ូក្រាល

ការ៉ូដែលយើងជ្រើសរើសមកប្រើនៅក្នុងអគារមានច្រើនប្រភេទ ដែលមានទំហំវិមាត្រខុសៗគ្នាទៅតាមទីកន្លែងនីមួយៗ ហើយត្រូវបានគេជ្រើសរើសប្រភេទការ៉ូសេរ៉ាមិច    ដែលមានទំហំ៦០០ x ៦០០ x ១២មម សំរាប់កំរាលខណ្ឌ និង ការ៉ូទំហំ ២០០ x ២០០ x ៦មម សំរាប់បន្ទប់ទឹក នៅផ្នែកដំបូលយើងប្រើឥដ្ឋកន្សែងដែលមានទំហំ 300mm x 300mm។

៣.១២ ប្លង់ទ្វារ និងបង្អួច

នៅក្នុងអគាររបស់យើងមានទ្វារប្រភេទដូចខាងក្រោម :

-​  ទ្វាររមួលដែកទាញឡើងចុះ និងទ្វារកញ្ចក់ប្រើសំរាប់ការវិយាល័យ

-  ទ្វារឈើមានពីរប្រភេទគឺប្រភេទខ្នាតធំប្រើសំរាប់បំពាក់នៅតាមបន្ទប់ស្នាក់នៅនីមួយៗ  និងទ្វារឈើប្រភេទខ្នាត​តូច គឺយើងប្រើសំរាប់បំពាក់នៅតាមបន្ទប់ទឹក

-  បង្អួចទាំងអស់ដែលបានបំពាក់នៅក្នុងអគារ គឺធ្វើឡើងដោយគ្រោងជ័រមានដាក់កញ្ចក់ពណ៌ទឹកខៀវដែលមានកំ​រាស់ 8mm អាចធន់និងការពារកំដៅថ្ងៃបានល្អ និងការពារនូវកំលាំងខ្យល់។

៣.១៣ ប្លង់បណ្តាញទឹក

បណ្តាញទឹកនៅក្នុងអគាររបស់យើងមានបីប្រភេទ :

-​  បណ្តាញទឹកភ្លៀង  គឺយើងតចេញពីទនៃដំបូលអគារដោយបំពង់ PVC ដែលបង្កប់អែបជាប់និងជ្រុងជញ្ជាំង​ចំ​ហៀងផ្នែកខាងក្រោយនៃអគារ​​  ហើយបង្ហូរចុះមកក្រោមចូលទៅក្នុងអាងស្តុកក្រោមដីហើយបានតភ្ជាប់ទៅកាន់​បណ្តាញ​​​​លូសាធារណៈតែម្តង។

-​  បណ្តាញទឹកស្អាត គឺជាទឹកដែលយើងត្រូវយកមកប្រើប្រាស់ក្នុងអគារទាំងមូលជាប្រភេទទឹកម៉ាស៊ីនដែលតភ្ជាប់​ចេញពី​បណ្តាញបំពង់មេរបស់រដ្ឋភ្ជាប់ទៅក្នុងអាងស្តុកទឹករបស់អគារ​  រួចហើយធ្វើការចែកចាយអោយប្រើប្រាស់ទៅ​តាម​ផ្នែកនីមួយៗ។ ហើយមានបណ្តាញទឹកមួយប្រភេទទៀត  ដែលបូមចេញពីអណ្តូងដោយម៉ាស៊ីនផ្ទាល់់របស់អគារទៅ​កាន់​អាង​ស្តុកទឹកក្នុងករណីដែលមានការរអាក់រអួលពីបណ្តាញសាធារណៈ។

-​  បណ្តាញទឹកស្អុយ គឺត្រូវបានតភ្ជាប់ចេញពីបណ្តាញប្រើប្រាស់ទឹកក្នុងអគារ ដោយបង្កប់បំពង់អែបនិងបំពង់ បណ្តាញ​ទឹកស្អាតដែលបានតភ្ជាប់ទៅអាងស្តុកនៅក្នុងដី ហើយបញ្ចោញទៅលូសាធារណៈ។

៣.១៤ ការបញ្ចោញចោល និងកាកសំណល់

-  កាកសំណល់រឹងដែលបានមកពីការប្រើប្រាស់ក្នុងអគារដូចជា កំទេចធូលី និងកំទេចកំទីសំរាម និងកាកសំណល់​ផ្សេងទៀតដែលមាននៅក្នុងអគារត្រូវដាក់ក្នុងធុងសំរាមរបស់អគារ     ហើយដឹកជញ្ជូនយកទៅចោលនៅកន្លែងស្តុក​សំរាម​​សាធារណៈតាមរថយន្តដឹកសំរាម។

-  ចំពោះលាមកវិញនៅគ្រប់បង្គន់ត្រូវបានតភ្ជាប់បណ្តាញបំពង់បង្ហូរដាក់ក្នុងអាងស្តុកក្រោមដី  និងបញ្ចោញទៅ​តាម​​លូ​សាធារណៈ។

៣.១៥ បណ្តាញអគ្គីសនី

-  បណ្តាញអគ្គីសនីដែលប្រើប្រាស់នៅក្នុងអគារត្រូវបានតភ្ជាប់ចេញពីបណ្តាញអគ្គីសនីរបស់រដ្ឋ  និងមានម៉ាស៊ីន ភ្លើងដែលជាកម្មសិទ្ធិផ្ទាល់មួយគ្រឿង   ដែលមានការគ្រប់គ្រងតាមលក្ខណៈបច្ចេកទេសត្រឹមត្រូវពីសំណាក់វិស្វករផ្នែក​អគ្គិសនីនិងមានកន្លែងគ្រប់គ្រងប្រព័ន្ធអគ្គីសនីដែលបានបំពាក់ដោយឧបករណ៍ទំនើប  និងមានប្រព័ន្ធសុវត្ថិភាពដើម្បី​បញ្ចៀសគ្រោះអាសន្ន។ ហើយយើងក៏បានរៀបចំនូវកាប៊ីនភ្លើងមួយនៅក្បែរអគារ ដើម្បីងាយស្រួលឆ្លាស់ភ្លើងជា​មួយ​ភ្លើង​​របស់​​​រដ្ឋហើយនឹងមានការងាយស្រួលក្នុងការគ្រប់គ្រងនិងបែងចែកភ្លើងទៅតាមផ្នែកនីមួយៗនៃផ្នែកអគារ។