ជំពូកទី ២ ការប្រៀបធៀបទៅនឹងលក្ខណៈសេដ្ឋកិច្ចនៃការលើកគម្រោង (Project: Nita Apartment)

ជំពូកទី ២

ការប្រៀបធៀបទៅនឹងលក្ខណៈសេដ្ឋកិច្ចនៃការលើកគម្រោង

ព្រះរាជាណាចក្រកម្ពុជាជាប្រទេសមួយដែលកំពុងតែមានការអភិវឌ្ឍន៍​​ និងកសាងឡើងវិញនូវហេដ្ឋារចនាសម្ព័ន្ធ​គ្រប់​បែបយ៉ាង។ ​ដោយសារតែប្រទេសយើងធ្លាប់បានឆ្លងកាត់នូវសង្រ្គាមអូសបន្លាយពេលជាច្រើនទសវត្សរ៍ និងរបប ប្រល័យ​ពូជសាសន៍កម្ពុជាប្រជាធិបតេយ្យបានធ្វើ​អោយមានការធ្លាក់ចុះលើគ្រប់វិស័យទាំងសេដ្ឋកិច្ច វប្បធម៌ ជំនឿ សាសនា និង​ប្រព័ន្ធ​ហេដ្ឋារចនាសម្ព័ន្ធជាតិខ្ចិ​ចខ្ទាំដល់កំរិតសូន្យ។ ដូច្នេះហើយយើងទាំង​អស់គ្នាត្រូវ​តែខិតខំប្រឹងប្រែង កសា​ងនិង​ស្តារ​ប្រទេសជាតិអោយរីកចំរើនសារជាថ្មីសំរាប់ជាស្នាដៃ និង​កេរ្តិ៍ឈ្មោះ​បន្សល់ទុកអោយកូនចៅជំនាន់ក្រោយ​​។ អាស្រ័យ​ហេតុនេះក្រុមសារណាទាំងអស់គ្នាបានលើកយកនូវគម្រោងសាងសង់អគារមួយដែលជាផ្នែកតូចមួយដើម្បី​រួម​ចំណែកជា​មួយរាជ​រដ្ឋាភិបាលនៅក្នុងការអភិវឌ្ឍន៍រាជធានីភ្នំពេញ ដែលជាបណ្តុំសេដ្ឋកិច្ចពាណិជ្ជកម្ម ទេសចរណ៍ និងជាបេះដូងនៃ​ព្រះរា​ជា​ណា​ក្រកម្ពុជាយើង។

២.១ កម្មវត្ថុនៃការលើកគម្រោង

          ការលើកគម្រោង អគារស្នាក់នៅប្រមូលផ្តុំ នីតា គឺក្រុមនិសិ្សតយើង​ចង់​វាស់​ស្ទង់​នូវ​កំរិត​ចំ​​ណេះដឹង ក្រោយពីបពា្ចប់ការសិក្សារយៈពេល ៥ឆ្នាំ ថាខ្លួនមានសមត្ថភាពប៉ុណ្ណានិងចង់បង្ហាញអោយមហាជនទូ​ទៅ ទាំង​ថ្នាក់​ជាតិ និងអន្តរជាតិអោយបានឃើញថាប្រទេសកម្ពុជាយើងក៏មានធនធានមនុស្សផ្នែកបច្ចេកទេសសាងសង់​នេះដែរ។ ម្យ៉ាង​ទៀត​ចង់បង្ហាញថា​ យើងក៏មានសមត្ថភាពគ្រប់គ្រាន់ដើម្បីបម្រើការងារលើវិស័យនេះមិនចាញ់ ប្រទេសជិត​ខាងក៏ដូច​ជាលើឆាកអន្តរជាតិនោះឡើយ។

២.២ ការប្រៀបធៀបលក្ខណៈសេដ្ឋកិច្ច

          ជាទូទៅនៅពេលដែលមានគម្រោងសាងសង់អ្វីមួយ យើងត្រូវតែមានការពិចារណាអោយបានគ្រប់ជ្រុងជ្រោយ និង ត្រឹមត្រូវប្រកបដោយភាពជាក់លាក់និងភាពសន្សំសំចៃបំផុត។ ជាពិសេសសំភារៈដែលយកមកប្រើប្រាស់នៅក្នុងការដ្ឋាន សាងសង់ត្រូវមានការសិក្សាយ៉ាងលម្អិត និងឆ្លងកាត់ការធ្វើពិសោធន៍យ៉ាងច្បាស់លាស់ទៅលើគុណភាព។ ម្យ៉ាងវិញទៀត ការប្រើប្រាស់សំភារៈនៅក្នុងការដ្ឋានមិនមែនគ្រាន់តែមានលក្ខណៈសន្សំសំចៃប៉ុណ្នោះទេ គឺត្រូវពិចារណាផងដែរទៅលើ សុវត្ថិភាព។ ដូច្នេះក្នុងនាមយើងជាវិស្វករត្រូវតែគិតគូដល់លក្ខណៈសេដ្ឋកិច្ចនិងសុវត្ថិភាពជាចម្បង។ ការលើកគម្រោង សាងសង់ចាំបាច់យើងត្រូវតែធ្វើការសិក្សាទៅលើករណីមួយចំនួនរួមមានដូចខាងក្រោម

២.២.១ ការជ្រើសរើសបេតុងសម្រាប់ធ្វើការសាងសង់

          ក្នុងគម្រោងសាងសង់នេះយើងបានកំនត់យកបេតុងលាយស្រេចពីរោងចក្រ និងបេតុងលាយនៅការដ្ឋាន។ សម្រាប់​​បេតុងដែលយកមកប្រើប្រាស់ក្នុងគម្រោងសាងសង់របស់យើងមួយចំនួនធំ គឺប្រើប្រាស់បេតុងលាយស្រេច​ពី​រោង​ចក្រ​ព្រោះជា​បេតុងលាយបានលឿន​ ចំណេញ​ពេលវេលា មានភាពស្មើសាច់ ងាយស្រួលចាក់ ងាយស្រួលក្នុង​ការ​កំណត់​ភាព​ធន់ (Strength) ងាយស្រួលក្នុងការកំណត់ភាពរាវ (Slump) ទៅតាមការប្រើប្រាស់របស់គ្រឿងបង្គុំនិង​មាន​​ភាព​​ងាយ​​ស្រួល​​​ក្នុ​ង​​ការ​កំណត់​កម្លាំងពលកម្មជាមធ្យមនៅក្នុងការដ្ឋានផ្ទាល់។

២.២.២ ការជ្រើសរើសប្រភេទកម្រាលខណ្ឌ

ជាទូទៅកម្រាលខណ្ឌកើតឡើងដោយការបន្សំរវាងស្រទាប់ជាច្រើនដូចជា ស្រទាប់បេតុង ស្រទាប់បាយអរ និង​ស្រទាប់ឥដ្ឋការ៉ូ។ កម្រាលខណ្ឌ ឬគេហៅម្យ៉ាងទៀតថាប្លង់សេត្រូវបានគេចែកជាពីរប្រភេទគឺ កម្រាល​ខណ្ឌ​តាន់ និង​កម្រាល​ខណ្ឌប្រហោង។ ភាគច្រើននៅក្នុងប្រទេសយើងរាល់ការសាងសង់​សំណង់ផ្សេង​ៗ​គេនិយម​កម្រាលខណ្ឌតាន់​ព្រោះ​វាមានភាពងាយស្រួលជាង។ ការសិក្សាកម្រាលខណ្ឌតាន់នេះទៀតសោតត្រូវបានគេចែកជាពីប្រភេទទៀតគឺ​កម្រាល​ខណ្ឌមួយទិស និងកម្រាលខណ្ឌពីរទិស។ ចំណែកឯកម្រាលខណ្ឌប្រអប់វិញគេនិយមប្រើធ្វើជាប្រភេទបេតុង​ប្រេ​កុង ត្រាំងដោយប្រើខ្សែកាប ឧទារណ៍ដូចជាសំណង់ស្ពានជាដើម។ តាមការសិក្សាកន្លង​មក​កម្រាលខណ្ឌប្រអប់​​​​ដោយ​​​​សារ​វាមានប្រហោងខ្យល់ ដែលជាអ៊ីសូឡង់ជួយកាត់បន្ថយកំដៅ និងសម្លេង ប៉ុ​ន្តែក​ម្រាលខណ្ឌ​ប្រភេទនេះទាម​ទារនូវ បច្ចេកទេសខ្ពស់​ និងចំណាយ​ ថវិកា​អស់ច្រើនដោយហេតុថាប្រទេសយើងមានលក្ខណៈអាកាសធាតុមិនសូវ​ក្តៅ​​ខ្លាំង​ទើប​យើង​សម្រេចចិត្តប្រើប្រាស់​កម្រាលខណ្ឌតាន់ក្នុងការលើកគម្រោងសាងសង់។

២.២.៣ ការជ្រើសរើសប្រភេទធ្នឹម និងសសរ

បច្ចុប្បន្ននេះបច្ចេកទេសកាន់តែមានភាពរីកចម្រើនទៅមុខពីមួយថ្ងៃទៅមួយថ្ងៃ។  ក្នុងនោះមានប្រព័ន្ធព័​ត៌មាន​វិទ្យា​​និងជាពិសេសវិស័យសំណង់ក៏កំពុងតែមានសក្តានុពលផងដែរ។ ការជ្រើស​រើស​គ្រឿងបង្គុំ​សំណង់ក៏ដូចជាប្រភេទ​មុខកាត់​អោយមានលក្ខណៈសេដ្ឋកិច្ចមានន័យថា ​ការចំនាយ​ថវិការបាន​សម​រម្យ​។ យ៉ាងណាមិញការជ្រើសរើស​ប្រភេទ​​ធ្នឹមមាន ច្រើនប្រភេទដូចជាប្រភេទធ្នឹមរាងអក្សរ T រាងអក្សរ L រាងចតុកោណកែងជា​ដើមដែលត្រូវបាន​គេ​ផលិត​​ពីបេតុងអាម៉េ   និងបេតុងប្រេកុងត្រាំង។ រីឯនៅក្នុង​គម្រោង​​​បពា្ចប់ការសិក្សារបស់យើងសម្រេចចិត្តជ្រើសរើស​យក​ធ្នឹម​រាងចតុកោណ កែង​ធ្វើពីបេតុងអាម៉េព្រោះ​​វាមានលក្ខណៈងាយស្រួលក្នុងការសាងសង់ ការប្រើប្រាស់ពុម្ព និង​មាន​លក្ខណៈសន្សំសំចៃ ផងដែរ។   ចំពោះសសរវិញមានច្រើនប្រភេទដូចជាសសររាងអក្សរ T រាងអក្សរ L រាង​ចតុ​កោណ​កែង រាងការេ និងរាងមូល​ជាដើម។ ក្នុងគម្រោងបពា្ចប់ការសិក្សារបស់យើងសម្រេចចិត្តជ្រើសរើសយក​សសរ​រាង​​ចតុកោណកែងធ្វើពី បេតុងអាម៉េព្រោះវាមានលក្ខណៈងាយស្រួលក្នុងការសាងសង់ ការប្រើប្រាស់ពុម្ព និងមាន​លក្ខណៈ​សេដ្ឋកិច្ចផង។

២.២.៤ ការជ្រើសរើសប្រភេទដែកសម្រាប់ធ្វើការសាងសង់

          យើងសង្កេតឃើញថាសព្វថ្ងៃនេះប្រទេសកម្ពុជាមានផលិតផលដែកជាច្រើនប្រភេទ ដែលនាំចូលមកពីបរទេស​ដូច​ជាប្រទេសចិន កូរ៉េ អ៊ីតាលី ថៃ វៀតណាម ជាដើម។ ក្នុងការសិក្សាពី​គម្រោង​សាងសង់​របស់​យើង​វិញបាន​ជ្រើស​រើស​យកប្រភេទដែកដែលផលិតក្នុងប្រទេសអ៊ីតាលីដែលមានប្រភេទដូចជា

-       ដែកថ្នាំងអំពៅមានភាពធន់ (Yield Strength) f_y= 390MPa

-       ដែករលោងមានភាពធន់   (Yield Strength) f_y= 235 MPa

ដែកប្រភេទនេះមានភាពធន់ ឬរេស៊ីស្តង់មិនខ្ពស់ហើយក៏មិនទាបពោលគឺ អាចប្រើប្រាស់បានចំពោះ​លក្ខណៈ​បច្ចេកទេស ម្យ៉ាងទៀតវាមានតម្លៃសមស្របទៅនិងលក្ខណៈសេដ្ឋកិច្ចដែលយើងចង់បាន។ ជាពិសេសជាងនេះទៅ​ទៀត​យើងមានភាពងាយស្រួលក្នុងការរកបញ្ជាទិញ កាត់បន្ថយការចំណាយលើការនាំចូល និងការដឹកជញ្ជូន។

២.២.៥ ការជ្រើសរើសកម្លាំងពលកម្ម

          ចំពោះការជ្រើសរើសកម្លាំងពលកម្មវិញ​ ​ជាជំហ៊ានដំបូងត្រូវរៀបចំលំនៅដ្ឋានបណ្តោះអាសន្នសម្រាប់អោយ​ពួក​គាត់ស្នាក់នៅសិនដើម្បីមានភាពងាយស្រួលក្នុងការគ្រប់គ្រងពួកគាត់ និងទំនាក់ទំនង​ជាមួយពួក​គាត់នៅ​​​​ពេល​ដែលមាន​ការ​ងារបន្ទាន់ត្រូវធ្វើ។ កម្មករសំណង់ដែលត្រូវជ្រើសរើសត្រូវតែជាជនជាតិខ្មែរព្រោះយើងចង់ផ្តល់ការងារអោយពួក​គាត់​​បាន​ធ្វើ​​ ក្នុងគោលបំណង​ដើម្បីរួមចំណែកជាមួយរដ្ឋាភិបាលក្នុងការកាត់បន្ថយភាពក្រីក្ររបស់ប្រជាពលរដ្ឋ​បាន​មួយ​កម្រិត​ថែម​ទៀត។​ ការជ្រើសរើសវិស្វករ អ្នកជំនាញ និងមេ​ជាង​កាន់​កា​រដ្ឋាន​ត្រូវបានការិយាល័យគ្រប់គ្រង​ធន​ធាន​មនុស្សរបស់​យើង​ធ្វើ​​ការជ្រើសរើសយ៉ាងសម្រិតសម្រាំងបំផុត​ ​ដើម្បីកុំអោយការដ្ឋានរបស់យើងមាន​បញ្ហាជាយ​ថា​ហេតុបណ្តាល​អោយមាន​ការខាត​​បង់ថវិកា និងពេលវេលាដែលអាចជះឥទ្ធិពលមិនល្អដល់ការ​អនុវត្តន៍គម្រោង​របស់​យើង។

២.៣ លក្ខណៈភូមិសាស្ត្រ

២.៣.១ ទីតាំងគម្រោងសាងសង់

            ចំពោះគម្រោង អគារស្នាក់នៅប្រមូលផ្តុំ នីតា ត្រូវបានសាងសង់ស្ថិតនៅផ្លូវលេខ ៥៥៨ សង្កាត់ បឹងកក់១ ខណ្ឌ ទោលគៅក រាជធានីភ្នំពេញ។

២.៣.២ អាកាសធាតុ

            ជាទូទៅអាកាសធាតុនៅប្រទេសកម្ពុជាយើងមានលក្ខណៈក្តៅហើយសើម និងមានរបបខ្យល់មូសុងពីរបក់ផ្ទុយគ្នា​

          ក. រដូវប្រាំង (ពីខែ វិច្ឆិកា-មេសា) ខ្យល់បក់ពីទិសឦសានទៅទិសនិរតី គឺខ្យល់បក់ពីតំបន់ស៊ីបេរីទៅមហាសមុទ្រ​ឥណ្ឌា​​ដោយនាំមកនៅខ្យល់ត្រជាក់ស្ងួត។

          ខ.​ រដូវស្សា (ពីខែ ឧសភា-តុលា) ខ្យល់បក់ពីទិសនិរតីទៅទិសឦសាន គឺខ្យល់បក់ពីមហាសមុទ្រឥណ្ឌាទៅតំបន់​ស៊ី​បេរីវិញដោយនាំមកនូវទឹកភ្លៀងស្រោចស្រពលើទឹកដីកម្ពុជា។ ទីក្រុងភ្នំពេញមានល្បឿនខ្យល់ជាមធ្យម 18m/s មានស៊ី​តុណ្ហ​ភាពប្រចាំឆ្នាំ 27.3C ហើយមានបំរែបំរួលពី 2C ទៅ 3C ។ ចំពោះសំណើមបរិយាកាស​ដែល​ខ្ពស់​បំផុត​គឺ 83% នៅខែមិនា។ រីឯបរិមាណទឹកភ្លៀងវិញជាមធ្យមប្រមាណ 246.6mm នៅខែកញ្ញា និងអប្បបរមា 5.6mm នៅខែ វិច្ឆិកា។

២.៣.៣ ស្ថានភាពប្រជាពលរដ្ឋនៅទីក្រុងភ្នំពេញ

            ដោយមានទំនុកចិត្តលើផ្នែកសន្តិសុខ សុវត្ថិភាព និងស្ថេរភាពនយោបាយរបស់រាជរដ្ឋាភិបាលនៃព្រះរាជា​ណា​ចក្រ​​កម្ពុជា ដោយមើលឃើញពីស្ថានភាពរស់នៅរបស់ប្រជាជនក្នុងទីក្រុងភ្នំពេញមានជីវភាពកាន់តែប្រសើរជាពិ​សេស​តាម​អត្រា​កំណើននៃភ្ញៀវទេសចរណ៍ជាតិ និងអន្តរជាតិដែលមានការកើនទ្បីងពីមួយឆ្នាំទៅមួយឆ្នាំទៅតាមអត្រានៃ​កំណើន​ប្រ​ជា​​​ពលរដ្ឋ កំណើនអ្នកវិនិយោទុនផ្សេងៗ និងបុគ្គលិកអង្គការអន្តរជាតិមួយចំនួនដែលមាន​មូលដ្ឋានស្នាក់​នៅ និងបំរើការ​នៅ​​​ក្នុង​ទី​ក្រុងភ្នំពេញនេះស្រាប់ធ្វើអោយក្រុមសារណាយើងស្រាវជ្រាវយើងខ្ញុំមានគំនិតសាងនូវអាគារ​ស្នាក់នៅ​ដើម្បីជួយ​រំ​លែក​ទុក្ខលំបាករបស់ប្រជាពលរដ្ឋក៏ដូចជាការលំបាករបស់រដ្ឋាភិបាលផងដែរ។

២.៣.៤ ប្រព័ន្ធគមនាគមន៍

            ដោយទីក្រុងភ្នំពេញជាមជ្ឈមណ្ឌលពាណិជ្ជកម្មដ៏ធំ និងជាបេះដូងនៃព្រះរាជាណាចក្រកម្ពុជាផង ដូចនេះរាល់​ការ​ទំនាក់​​ទំនងពីទីក្រុងទៅបណ្តាខេត្តនានាទូទាំងប្រទេសត្រូវូពឹងផ្អែកលើប្រព័ន្ធគមនាគមន៍ជាពិសេស។

          ក. ផ្លូវគោក វាជាផ្នែកមួយដែលបំរើដល់ការធ្វើដំណើរ និងដឹកជញ្ជូនដែលមានផ្លូវជាតិជាច្រើនខ្សែតភ្ជាប់ពីទី​ក្រុង​ទៅបណ្តាខេត្តនានាក្នុងព្រះរាជាណាចក្រកម្ពុជា។

          ខ. ផ្លូវទឹក  ក៏ជាផ្នែកមួយដែលបំរើដល់ការធ្វើដំណើរ និងដឹកជញ្ជូនផងដែរ។ យើងអាចធ្វើដំណើរពីទីក្រុងភ្នំ​ពេញ​ទៅ​​តាមបណ្តាខេត្តមួយចំនួនតាមរយៈនាវាដឹកជញ្ជូនអ្នកដំណើរ និងនាវាទេសចរណ៍ជាដើម។

          គ. ផ្លូវអាកាស ជាផ្នែកមួយដែលបំរើដល់ការធ្វើដំណើរ និងដឹកជញ្ជូនផងដែរ។ យើងអាចធ្វើដំណើរពីអាកាស​យាន​​ដ្ឋានអន្តជាតិភ្នំពេញទៅតាមបណ្តាខេត្តមួយចំនួនតាមរយៈសេវាកម្មក្នុងស្រុក និងទៅតាមបណ្តាប្រទេសមួយ​ចំនួន​​ក្នុង​​​តំបន់អាស៊ីអាគ្នេយ៍ និងអន្តរជាតិតាមរយៈសេវាកម្មអន្តរជាតិទៀតផង។

២.៣.៥ ប្រព័ន្ធទូរគមនាគមន៍

            បច្ចុប្បន្នមានក្រុមហ៊ុនវិនិយោគទុនលើវិស័យទូរគមនាគមន៍ជាច្រើន ដែលកំពុងធ្វើការប្រកួតប្រជែងគ្នាដើម្បី​ពង្រីក​​​នូវសេវាកម្មរបស់ខ្លួនដែលជាការលើកទឹកចិត្តដល់អតិថិជនដែលកំពុងប្រើប្រាស់ប្រព័ន្ធរបស់គេ។ ក្រៅពីប្រព័ន្ធ​ឯកជន យើង​ក៏មានការដាក់អោយប្រើប្រាស់នូវប្រព័ន្ធទូរគមនាគមន៍របស់រដ្ឋផងដែរ។

២.៣.៦ ប្រព័ន្ធចែកចាយអគ្គីសនី

            វិស័យអគ្គីសនី គឺជាវិស័យមួយដែលមានសារៈសំខាន់បំផុតដែលរាជរដ្ឋាភិបាលកំពុងតែយកចិត្តទុកដាក់យ៉ាង​ខ្លាំង​​ដើម្បី​ឈានទៅរកការអភិវឌ្ឍន៍វិស័យផ្សេងៗទៀត។ សព្វថ្ងៃទោះបីជាការផ្គត់ផ្គង់ផ្នែកថាមពលអគ្គីសនីនូវ​មាន​កំរិត​ក៏​ដោយតែនៅថ្ងៃអនាគតដ៏ឆាប់ខាងមុខយើងសង្ឃឹមថាវានឹងមានលក្ខណៈកាន់តែប្រសើរទ្បើង។

២.៣.៧ បណ្តាញចែកចាយទឹក

            ក. ការផ្គត់ផ្គង់ទឹកប្រើប្រាស់: ការប្រើប្រាស់ទឹកស្អាតរបស់ប្រជាពលរដ្ឋក្នុងក្រុងភ្នំពេញនិងនៅតំបន់ជាយក្រុងមួយ​ចំនួន គឺជាការផ្គត់ផ្គង់និងចែកចាយដោយរដ្ឋាករទឹកស្វយ័តក្រុងភ្នំពេញ។ ហើយប្រភពទឹកទាំងនោះ គឺបូមមកពីទន្លេ​មេគង្គដោយឆ្លងកាត់តាមប្រព័ន្ធចម្រោះបានយ៉ាងត្រឹមត្រូវទៀតផង។

          ខ. ប្រព័ន្ធទឹកស្អុយ: ជាទូទៅបណ្តាញទឹកស្អុយដែលហូរចេញពីគេហដ្ឋានរបស់ប្រជាពលរដ្ឋនីមួយៗត្រូវបានរៀប​ចំ​​អោយ​ហូរ​ចូលទៅក្នុងប្រព័ន្ធលូមេរបស់ក្រុង ហើយហូរនាំទឹកស្អុយនោះតាមតំបន់ស្តុកទឹកនីមួយៗដែលមានស្រាប់។

២.៣.៨ បញ្ហាសន្តិសុខ       

            ជារួមផ្នែកសន្តិសុខវិញ យើងអាចនិយាយបានថាមានលក្ខណៈល្អប្រសើរតែម្តងតាមរយៈភ្ញៀវទេសចរណ៍ជាតិ និង​អន្តរ​​​​ជាតិ ដែលពួកគាត់អាចធ្វើដំណើរកំសាន្តតាមរមណីយដ្ឋាននានាទូទាំងព្រះរាជាណាចក្រកម្ពុជាដោយគ្មានការ​ព្រួយ​បារម្ភ​​ពីសុវត្ថិភាពរបស់ពួកគាត់ឡើយ។