សារណា វិស្វកម្មសំណង់ស៊ីវិល ការគណនាសំណង់អគារ គណនាសរសៃដែក​​ ជំពូកទី ១ សេចក្ដីផ្ដើម (Project: Nita Apartment)

ជំពូកទី ១

សេចក្ដីផ្ដើម

១.១ បុព្វហេតុនៃការស្រាវជ្រាវ

​នាពេលបច្ចុប្បន្ននេះ ព្រះរាជាណាចក្រកម្ពុជាបានធ្វើការ​អភិវឌ្ឍទៅមុខលើគ្រប់វិស័យពាសពេញផ្ទៃប្រទេស ក្នុងនោះផងដែរក៏មានការស្ថាបនាហេដ្ឋារចនាសម្ព័ន្ធទាំងឡាយ និង​សំណង់​អគារ សំណង់សហគ្រាសធំៗ អគារពាណិជ្ជកម្ម  សណ្ឋាគារ  រោងចក្រ គេហដ្ឋាន  អគារសាធារណៈ គ្រឹះ​ស្ថាន​​សិក្សា​ផ្សេងៗ​ដែលសុទ្ធ​សឹង​តែផុសចេញពីស្នាដៃវិស្វកម្មដែលខិតខំប្រឹងប្រែងយ៉ាងម៉ត់ចត់របស់ស្ថាបត្យករ និង​វិស្វករ​។ រាល់វិស្វ​កម្ម​ទាំងអស់​នោះ​​សុទ្ធតែជាផ្លែផ្កានៃការប្រឹងប្រែងរបស់វិស្វករ ដែលបានបញ្ចេញនូវទេពកោសល្យ​ក្នុង​ការ​​ស្ថាបនា​​ចេញ​ជារូបរាងឡើងដើម្បី​កែ​ប្រែ​វិស័យនេះអោយមានការរីកចំរើន និងទំនើបដូចប្រទេសនានាក្នុង​ពិភព​លោក​។ រាល់ សំណង់ទាំងអស់សុទ្ធ​តែ​បាន​បង្ហាញពីភាពវាងវៃប្រកបដោយគំនិតច្នៃប្រឌិតរបស់វិស្វករ ធ្វើអោយ​សំណង់​មាន​​ភាព​ទំនើប រស់រវើក និងពោរពេញ​ទៅដោយលក្ខណៈបច្ចេកទេសត្រឹមត្រូវ។ ឆ្លងតាមរយៈសំណង់​សាធា​រណៈ​​បានឆ្លុះ​បញ្ចាំង​ពីវិស័យ សេដ្ឋកិច្ច វប្បធម៌​របស់​ប្រទេស​ជាតិនីមួយៗយ៉ាងពិតប្រាកដ។ បើតាមហេដ្ឋារចនា​សម្ព័ន្ធ​នៃ​ព្រះរាជា​ណាចក្រកម្ពុជាពីមុន ត្រូវបានទទួលរង​គ្រោះ​យ៉ាង​ដំណំដោយសារតែសង្គ្រាមរ៉ាំរៃ ដែលបានអូសបន្លាយ​ពេល​អស់​រយៈ​ពេល​ជាច្រើនឆ្នាំបាន បំផ្លិចបំផ្លាញហេដ្ឋា​រចនា​សម្ព័ន្ធ ព្រមទាំងទ្រព្យសម្បត្តិសាធារណៈខ្ទេចខ្ទីគ្មាន​សល់ស្ទើរតែ​ទាំង​ស្រុង​​​​ដែលធ្វើអោយប្រជា ពលរដ្ឋទទួល​រង​ទុក្ខវេទនា​ឥត​​ស្រាកស្រាន្តដែលបានបន្សល់រហូតមក​ដល់សព្វថ្ងៃនេះ​។

          ដោយមានការរីកចំរើនខាងផ្នែកបច្ចេកវិទ្យានាពេលបច្ចុប្បន្នហើយកម្ពុជាជាប្រទេសដែលកំពុងអភិវឌ្ឍន៍ផងនោះ ការ​សាង​​សង់ និងការច្នៃប្រឌិតជាថ្មីនូវអគារទាំងទ្បាយដូចជា មន្ទីរពេទ្យ សាលារៀន គ្រឹះស្ថានអប់រំ​ អគារស្នាក់នៅ សំណង់​ធារាសាស្ត្រ ផ្លូវថ្នល់ ស្ពាន ជាដើម...។ល។ ទាំងអស់នេះសុទ្ធសឹងតែក្នុងគោលបំណងស្តារ និងអភិវឌ្ឍន៍ទ្បើង​វិញនូវ​ហេដ្ឋា​រចនាសម្ព័ន្ធដែលបានបាត់បង់ ដោយបានបង្កើតទ្បើងសំរាប់លើកសោភ័ណភាពផ្ទៃប្រទេសទាំងមូល និង​ប្រកប​ទៅដោយ ភាពរុងរឿងទៅថ្ងៃអនាគតដែរ។

          តាមរយៈសំណង់សាធារណៈ គឺបានឆ្លុះបញ្ចាំងអំពីវិស័យសេដ្ឋកិច្ច និងវប្បធម៌របស់ប្រទេសនីមួយៗ ថាតើជឿន​លឿនឬមិនជឿនលឿន។ ជាក់ស្តែង​កាលពីអតីតកាលតាមរយៈសំណង់ប្រាង្គប្រាសាទនៅក្នុងប្រទេសបានបញ្ជាក់ថា ប្រទេស​​កម្ពុជាជាប្រទេសមួយដែលមានភាពរីកចំរើនយ៉ាងខ្លាំងក្លាលើវិស័យស្ថាបត្យកម្ម ដែលរហូតមកដល់ពេលនេះ​នៅ​​តែធ្វើ​អោយ​​ពិ​ភព​លោកស្ញប់ស្ញែងនិងបច្ចេកទេសដ៏អស្ចារ្យមិនអាចមានពីរ គឺប្រាសាទអង្គរវត្តដែល​ជាកេរ្តិ៍មរតក​ពីដូនតា បាន​បន្សល់​​ទុក​។ លើសពីនេះទៅទៀត សំណង់ប្រាសាទនានាជាច្រើនសន្ធឹកសន្ធាប់សុទ្ធតែជាស្នាដៃរបស់ខ្មែរ​ដែល​ពូ​កែ​ខាង​វិស្វកម្ម និងស្ថាបត្យ​កម្មតែក្រោយមកនៅយុគសម័យក្រោយមហានគរដោយសារសង្គ្រាមបានធ្វើអោយ​គ្រប់​វិ​ស័យ នេះ​ធ្លាក់​ចុះ​ដល់​កំរិត​សូន្យជាពិសេសវិស័យស្ថាបត្យកម្ម និងវិស្វកម្មតែម្តងបើប្រៀបធៀបទៅនឹង​ប្រទេស​ដែល​កំពុង អភិវឌ្ឍន៍ និងប្រទេស​អភិ​វឌ្ឍន៍។

១.២ គោលបំណងនៃការសិក្សា

            ដោយសព្វថ្ងៃនេះ នៅទីក្រុងភ្នំពេញក៏ដូចជានៅតាមជាយក្រុងកំណើនប្រជាជានកាន់តែកើនឡើងពីមួយឆ្នាំ​ទៅ​មួយ​ឆ្នាំដែលជាហេតុធ្វើអោយពួកគាត់ត្រូវការលំនៅដ្ឋានជាចាំបាច់ ហើយលំនៅដ្ឋាននោះទៀតសោតគឺពួកគាត់​ចង់​បាន​ទៅ តាមប្រភេទផ្សេងៗគ្នាដូចជា ផ្ទះល្វែង ផ្ទះវិឡា ឬជាប្រភេទអគារធំៗដែលរស់នៅជាលក្ខណៈប្រមូលផ្តុំ​ជា​ដើម​។ អាស្រ័យ ដូច​នេះហើយបានជាសាកលវិទ្យាល័យន័រតុនបានផ្តល់អាទិភាពអោយក្រុមសិក្សាស្រាវជ្រាវដែលជាក្រុម​សារ​ណា​នេះ​លើក គម្រោងអគារមួយដែលជាប្រភេទអគារស្នាក់នៅដែលមានកំពស់ ៨ជាន់ ហើយវានឹងក្លាយ​ជាលំនៅដ្ឋាន​របស់ប្រជា​ពល​​រដ្ឋនាពេលខាង​មុខ។

     គោលបំណងជាចំបងនៃការលើកគម្រោងអគារស្នាក់នៅនេះបង្កើតទ្បើងដើម្បី:

-       សិក្សាលើលក្ខណៈស្ថាបត្យកម្មរបស់អគារដើម្បីធានានូវសោភ័ណភាព និងសុខមាលភាពនៃការស្នាក់នៅ

-       ស្រាវជ្រាវ និងវិភាគលើគ្រឿងបង្គុំសំណង់ដើម្បីធានាភាពរឹងមាំរបស់អគារ

-       ស្រាវជ្រាវ  និងវិភាគលើផ្នែកបច្ចេកវិទ្យានៃការសាងសង់ សន្តិសុខ សុវត្ថិភាពការងារ និងគ្រឿងចក្រ

-       ស្រាវជ្រាវ និងវិភាគលើផ្នែកសេដ្ឋកិច្ចក្នុងគោលដៅបង្កើននូវលក្ខណៈសន្សំសំចៃថវិកា និងការបែងចែក​ថវិកា​តាមដំណាក់កាលនៃការសាងសង់។

១.៣ សារៈប្រយោជន៍នៃការសិក្សាស្រាវជ្រាវ

          ស្តែងចេញពីវត្ថុបំណងខាងលើ លទ្ធផលនៃការសិក្សាស្រាវជ្រាវនឹងផ្តល់នូវផលប្រយោជន៍មួយចំណែកក្នុង​ការ​ចូល រួមផ្តល់ជាបទពិសោធន៍លើផ្នែកវិស្វកម្ម និងលក្ខណៈបច្ចេកទេសសម្រាប់ជាគន្លឹះនៃការអភិវឌ្ឍន៍លំនៅដ្ឋាន​អោយ​មាន​លក្ខណៈសមស្របទៅតាមសេចក្ដីត្រូវការនៃសង្គមជាតិ និងការផ្តល់សុខមាលភាព និងសុវត្ថិភាពដល់​ការស្នាក់​អាស្រ័យ​។ ម្យ៉ាងទៀងលទ្ធផលនេះក៏ជាឯកសារមួយសម្រាប់ផ្តល់នូវបទពិសោធន៍ខ្លះៗ និងរក្សាទុកជាឯកសារដល់​និស្សិត​ជំនាន់ក្រោយ​ក្នុងការសិក្សាស្រាវជ្រាវផងដែរ។

១.៤ ទំហំ និងដែនកំណត់នៃការសិក្សាស្រាវជ្រាវ

            ដោយការសិក្សាលើផ្នែកវិស្វកម្មមានទំនាក់ទំនងដោយខានពុំបានជាមួយផ្នែកស្ថាបត្យកម្ម និងក្នុងបំណង​ដោះ​ស្រាយ នូវចំណោទបញ្ហាខាងលើបានកំណត់ធ្វើការសិក្សាស្រាវជ្រាវជាចំបងលើផ្នែកស្ថាបត្យកម្ម ផ្នែកវិភាគនិង​គណនា​​គ្រឿងបង្គុំ ផ្នែកវិភាគលើគម្រោងគ្រឹះ ផ្នែកបច្ចេកទេស និងសុវត្ថិភាពការងារសាងសង់ ផ្នែកផែនការប្រតិទិនការងារ និងសេដ្ឋកិច្ច លើគម្រោងអគារស្នាក់នៅប្រមូលផ្តុំដែលមានកំពស់ ៨ជាន់ ហើយមានទំហំ 1280m² បណ្តោយប្រវែង  16m និង ទទឹង​មាន​​ប្រវែង  10m​ ស្ថិតនៅ ផ្លូវលេខ ៥៥៨ សង្កាត់ បឹងកក់១ ខណ្ឌ ទោលគៅក រាជធានីភ្នំពេញ។